Home
રાજકારણ
ગુજરાતમાં આમ આદમી પાર્ટીને મોટો ઝટકો, રાજુભાઈ કરપડાનું રાજીનામું

ગુજરાતમાં આમ આદમી પાર્ટીને મોટો ઝટકો, રાજુભાઈ કરપડાનું રાજીનામું

08:59 PM February 11, 2026 Gujju News Channel

Rajubhai Karpada resigns: ગુજરાતમાં આમ આદમી પાર્ટીને મોટો ઝટકો લાગ્યો છે. પાર્ટીના એક અગ્રણી વ્યક્તિ અને તેના ખેડૂત સેલના વડા રાજુભાઈ કરપડાએ રાજીનામું આપી દીધું છે.

Aap Politician Raju karpada Resign From All position : ગુજરાતમાં આમ આદમી પાર્ટીને મોટો ઝટકો લાગ્યો છે. પાર્ટીના એક અગ્રણી વ્યક્તિ અને તેના ખેડૂત સેલના વડા રાજુભાઈ કરપડાએ રાજીનામું આપી દીધું છે. આ ઝટકો એવા સમયે આવ્યો છે જ્યારે પાર્ટી રાજ્ય વિધાનસભા ચૂંટણી માટે સક્રિય રીતે તૈયારી કરી રહી છે અને ખેડૂતોના મુદ્દાઓને ઉજાગર કરીને પોતાનો ટેકો વધારવાનો પ્રયાસ કરી રહી છે.

► અંગત કારણોસર પાર્ટી છોડી હોવાનો ઉલ્લેખ

સુરેન્દ્રનગર જિલ્લાના રહેવાસી અને ખેડૂતોના વિરોધ દરમિયાન ચર્ચામાં આવેલા રાજુભાઈએ સોશિયલ મીડિયા દ્વારા રાજીનામાની જાહેરાત કરી હતી. એવી અટકળો ચાલી રહી છે કે તેઓ ભારતીય જનતા પાર્ટી (ભાજપ)માં જોડાઈ શકે છે. અરવિંદ કેજરીવાલને લખેલા રાજુભાઈએ પોતાના રાજીનામા પત્રમાં લખ્યું છે કે તેમણે અંગત કારણોસર પાર્ટી છોડવાનો નિર્ણય લીધો છે. તેમણે લખ્યું છે કે, "વ્યક્તિગત કારણોસર, મારી વર્તમાન જવાબદારીઓ નિભાવવી મારા માટે શક્ય નથી. પાર્ટીએ મને આપેલી તક, આદર અને સમર્થન બદલ હું ખૂબ આભારી છું."

સોશિયલ મીડિયા પર રાજીનામું આપતા રાજુભાઈ કરપડાએ કહ્યું, "જય કિસાન સાથી... મિત્રો, આજે મેં આમ આદમી પાર્ટીના તમામ હોદ્દા પરથી રાજીનામું આપી દીધું છે. મારો નિર્ણય ઘણા લોકોને આશ્ચર્યચકિત કરી શકે છે. મેં મારા પરિવાર સાથે પાર્ટીને મજબૂત બનાવવા માટે મારા સમય અને પ્રયત્નોને પ્રાથમિકતા આપી હતી. પરંતુ નિયતિએ મને ત્યાં રહેવાનું નક્કી કર્યું હતું. જો મેં જાણી જોઈને કે અજાણતાં કોઈની લાગણીઓને ઠેસ પહોંચાડી હોય, તો હું માફી માંગુ છું. હું રાજ્ય અને આમ આદમી પાર્ટીના નેતૃત્વ, મારા બધા સાથીદારો અને ખેડૂત મિત્રોનો તેમના પ્રેમ અને સમર્થન બદલ આભાર વ્યક્ત કરું છું." તમને જણાવી દઈએ કે, રાજુભાઈ કરપડા ફક્ત AAPના ખેડૂત સેલના વડા જ નહોતા, પરંતુ રાજ્યમાં પાર્ટીના મુખ્ય નેતાઓમાં પણ ગણાતા હતા.

► શું કહ્યું આપના પ્રદેશ પ્રમુખ ઈસુદાન ગઢવીએ

ગુજરાત આમ આદમી પાર્ટીના પ્રદેશ અધ્યક્ષ ઇસુદાન ગઢવીએ રાજુ કરપડાના રાજીનામા અંગે પ્રતિક્રિયા આપતા જણાવ્યું છેકે, આજે ખેડૂત નેતા રાજુ કરપડાનું મને WhatsAppટપ પર રાજીનામું મળ્યું છે મારે વાત થઈ નથી પરંતુ એટલું ચોક્કસ કહીશ કે રાજુ કરપડાએ હડદડથી લઈ અને જે મુદ્દાઓ ખેડૂતોના ઉઠાવ્યા હતા. હડદડમાં એક ખેડૂતોને ઉમીદ પણ જાગી. તેમણે વધુમાં કહ્યું કે, રાજુ કરપડા, પ્રવીણ રામ અને 86 જેટલા લોકો ઉપર અત્યાચાર કરાયો, ખોટા કેસો કરવામાં આવ્યા અને તેમને ધમકાવવામાં આવ્યા તેમ છતાં પણ આ ખેડૂતોમાં અને ખેડૂત નેતાઓમાં જોમ અને જુસ્સો રહ્યો. ખેડૂતો માટે તેમણે ખૂબ મહેનત કરી છે. કઇ મજબૂરી હશે એ હજી મારે જાણી શકાયું નથી. પરંતુ એટલું ચોક્કસપણે કહીશ કે તેમણે ખેડૂત માટે અને ખેડૂતોને વ્યવસ્થિત ભાવ મળે, એપીએમસીમાં ચાલતી લૂંટને લઇને ખૂબ આંદોલનો કર્યા, મહેનત કરી. એટલે ખેડૂતો અને આમ આદમી પાર્ટી હંમેશા રાજુ કરપડાનું ખૂબ સમર્થન રહ્યું. આ સાથે જ ઇસદાન ગઢવીએ રાજુ કરપડાના રાજીનામા અંગે ભાજપ પર પ્રહારો કર્યા છે.

► ખેડૂત નેતા પ્રવીણ રામની શું છે પ્રતિક્રિયા

આમ આદમી પાર્ટીના પ્રદેશ ફ્રન્ટલ અધ્યક્ષ અને ખેડૂત નેતા પ્રવીણ રામની પણ આ સંદર્ભે પ્રતિક્રિયા સામે આવી છે. જેમાં તેમણે જણાવ્યું છેકે, રાજુ કરપડાના રાજીનામાના સમાચાર સાંભળીને હું વ્યક્તિગત રીતે ખૂબ દુઃખી છું, કારણ કે હડદડ મુકામે મે અને રાજુભાઈ બંનેએ ગુજરાતના ખેડૂતો માટે એક મજબૂત લડાઈ લડી. ગુજરાતના ખેડૂતો માટે એક મજબૂત અવાજ ઉઠાવવાનો અમે બંનેએ પ્રયત્ન કર્યો. તેમણે વધુમાં કહ્યું કે, ગુજરાતમાં ખેડૂતોની લડાઇ તોડી નાખવા માટે અમને અનેક યાતનાઓ આપવામાં આવી. 108 દિવસ જેલમાં પણ પૂરવામાં આવ્યા. અમાર પર દબાણ ઉભું કરવામાં પણ કંઇ બાકી નહોતું રાખ્યું. ત્યારે મને શંકા છેકે ભાજપની આ પ્રેશર ટેક્નિકના કારણે રાજુ કરપડાએ રાજીનામું આપ્યું હોઇ શકે છે. જોકે મારે કે પાર્ટીના અન્ય નેતાઓને તેમની સાથે વાત નથી થઇ. વાત થશે એટલે અમને યોગ્ય કારણ જાણવા મળશે જે અમે ગુજરાતની જનતા સામે રજૂ કરીશું.

► ડેડિયાપાડાના ધારાસભ્ય ચૈતર વસાવાએ શું કહ્યું ?

રાજુ કરપડાના રાજીનામા અંગે ડેડિયાપાડાના આપ ધારાસભ્ય ચૈતવ વસાવાની પ્રતિક્રિયા આવી છે, તેમણે જણાવ્યું છેકે, સમાચારના માધ્યમથી મને જાણવા મળ્યું છે, રાજુ કરપડાએ આમ આદમી પાર્ટીના તમામ પદ પરથી રાજીનામું આપી દીધું છે. મે એમનો સંપર્ક કરવાનો પ્રયાસ કર્યો પણ એમની સાથે સંપર્ક થયો નથી. હું જ્યાં સુધી રાજુ કરપડાને ઓળખું છું, ત્યાં સુધી એ ખેડૂતોના મજબૂત નેતા છે. આમ આદમી પાર્ટીમાં રહીને ખેડૂતોના ન્યાય માટે અનેક લડતો એમણે લડી છે. એમાંની એક લડત બોટાદ કડદા પ્રથા નાબૂદ કરવા માટે એમણે હડદડમાં આંદોલન કર્યું એ દરમિયાન એમને 100 દિવસથી પણ વધારે જેલમાં પણ રહેવું પડ્યું. ભાજપની જે વિપક્ષ પ્રત્યેની ડરાવવાની અને ધમકાવવાની નીતિ રહી છે તેના કારણે રાજુ કરપડાએ રાજીનામું ધર્યું હશે એવું મને લાગી રહ્યું છે.