Home
એન્ટરટેઇનમેન્ટ
વરૂણ ધવનની ફિલ્મ મુશ્કેલીમાં! ‘ચુનરી’ ગીતને લઈને મેકર્સ સામે ₹400 કરોડનો કેસ

વરૂણ ધવનની ફિલ્મ મુશ્કેલીમાં! ‘ચુનરી’ ગીતને લઈને મેકર્સ સામે ₹400 કરોડનો કેસ

11:29 PM May 29, 2026 Admin

Chunari Song Copyright Case : વરૂણ ધવનની ફિલ્મના સોંગના લીધે જાણીતા પ્રોડ્યુસર વાસુ ભગનાનીએ ફિલ્મના મેકર્સ વિરુદ્ધ ₹400 કરોડનો અધધધ કાયદાકીય કેસ ઠોકી દીધો છે

"Chunari Chunari" Song Copyright Case : બોલિવૂડ એક્ટર વરૂણ ધવનની આગામી ફિલ્મ ‘હૈ જવાની તો ઇશ્ક હોના હૈ’ને લઈને ટેન્શન વધી ગયું છે. આગામી 5 જૂનના રોજ આ ફિલ્મ સિનેમાઘરોમાં દસ્તક આપવા માટે તૈયાર છે, પરંતુ તે પહેલા જ ડિરેક્ટર ડેવિડ ધવન અને ‘ટિપ્સ’ મ્યુઝિક કંપની માટે મોટી મુશ્કેલીઓ ઊભી થઈ ગઈ છે. જાણીતા પ્રોડ્યુસર વાસુ ભગનાનીએ ફિલ્મના મેકર્સ વિરુદ્ધ ₹400 કરોડનો અધધધ કાયદાકીય કેસ ઠોકી દીધો છે. ચાલો જાણીએ શું છે આ આખો વિવાદ.

► ‘ચુનરી ચુનરી’ ના રિમેક સોંગ પર કોપીરાઈટ કેસ

વરૂણ ધવન અને તેના પિતા ડેવિડ ધવન હાલમાં આ ફિલ્મનું જોરશોરથી પ્રમોશન કરી રહ્યા છે. તાજેતરમાં જ આ ફિલ્મનું ગીત ‘ચુનરી ચુનરી’ રિલીઝ થયું હતું, જે બોલિવૂડના જૂના આઇકોનિક ગીતનું રિમેક છે. આ ગીત બહાર આવતાની સાથે જ પ્રોડ્યુસર વાસુ ભગનાની અને ફિલ્મના મેકર્સ વચ્ચે વિવાદ શરૂ થઈ ગયો હતો. હવે આ મામલે નવો અને મોટો વણાંક આવ્યો છે. વાસુ ભગનાનીની કંપની 'પૂજા એન્ટરટેઈનમેન્ટ લિમિટેડ'એ બોમ્બે હાઈકોર્ટમાં ટિપ્સ ઈન્ડસ્ટ્રીઝ લિમિટેડ, રમેશ તૌરાની, કુમાર એસ. તૌરાની અને ડેવિડ ધવન વિરુદ્ધ કેસ ફાઈલ કરીને મોટો ઝટકો આપ્યો છે.

► આ ગીતોના ઉપયોગ સામે વાસુ ભગનાનીને વાંધો

વરૂણ ધવનની આ ફિલ્મ પર વાસુ ભગનાનીએ પરવાનગી વિના ગીતોનો ઉપયોગ કરવાનો ગંભીર આરોપ લગાવ્યો છે. એક મીડિયા રિપોર્ટ અનુસાર, વાસુ ભગનાનીના વકીલ ‘વી. કે. દુબે એસોસિએટ્સ’ દ્વારા આ કેસ દાખલ કરવામાં આવ્યો છે. આ કાનૂની નોટિસમાં ફિલ્મના પ્રમોશનલ મટીરિયલ, વિવાદિત ગીત ‘ચુનરી ચુનરી’ અને ‘ઇશ્ક સોના હૈ’ના ઉપયોગ સામે સખત વાંધો ઉઠાવવામાં આવ્યો છે. આ સાથે જ ફિલ્મની ડિસ્ટ્રિબ્યુશન, સ્ટ્રીમિંગ અને કમર્શિયલ ઉપયોગ પર પણ રોક લગાવવાની માંગ કરવામાં આવી છે.

► વાસુ ભગનાનીની શું છે માંગણીઓ?

અદાલતે વાસુ ભગનાનીને કેસ ફાઈલ કરવાની મંજૂરી આપી દીધી છે અને ટૂંક સમયમાં જ આ મામલે સુનાવણી હાથ ધરવામાં આવશે. બોલિવૂડની આ અત્યાર સુધીની સૌથી મોટી કોપીરાઈટ લડાઈ માનવામાં આવી રહી છે. વાસુ ભગનાનીની મુખ્ય માંગણીઓ નીચે મુજબ છે:

• ફિલ્મની તમામ પ્રમોશનલ સામગ્રીમાંથી ‘ચુનરી ચુનરી’ અને ‘ઇશ્ક સોના હૈ’ ગીતોને તાત્કાલિક હટાવવામાં આવે.

• ફિલ્મના ટાઇટલ ‘હૈ જવાની તો ઇશ્ક હોના હૈ’ને પણ બદલવામાં આવે.

• પૂજા એન્ટરટેઈનમેન્ટે આ ગેરકાયદેસર ઉપયોગ બદલ ₹100 કરોડના નુકસાની વળતરની પણ માંગ કરી છે.

જો ટિપ્સ ઇન્ડસ્ટ્રીઝ અને ડેવિડ ધવન આ શરતો પૂરી નહીં કરે, તો ફિલ્મની રિલીઝ મુશ્કેલીમાં મુકાઈ શકે છે.

► મેકર્સ પર શું છે આરોપ અને ટિપ્સનો જવાબ

પૂજા એન્ટરટેઈનમેન્ટનો આરોપ છે કે ફિલ્મના મેકર્સ પાસે આ ગીતોનો ઉપયોગ કરવાના કોઈ કાયદેસરના રાઈટ્સ નહોતા. ઓરિજિનલ ઓડિયો-વિઝ્યુઅલ રાઈટ્સ વિના ગેરકાયદેસર રીતે આ ગીતોમાંથી ફાયદો ઉઠાવવાનો પ્રયાસ કરવામાં આવ્યો છે. જોકે, બીજી તરફ મ્યુઝિક કંપની ટિપ્સે સોશિયલ મીડિયા પર સત્તાવાર નિવેદન જાહેર કરીને આ તમામ આરોપોને પાયાવિહોણા અને ખોટા ગણાવ્યા છે. હવે જોવાનું એ રહેશે કે કોર્ટ આ મામલે શું ચુકાદો આપે છે અને વરૂણની ફિલ્મ 5 જૂને રિલીઝ થઈ શકે છે કે નહીં.