Home
હેલ્થ
New Virus HMPV Outbreak : શું ચીનમાં ફેલાયેલી નવી બીમારી કોરોના કરતાં પણ ખતરનાક છે? શું છે આ નવી બિમારીના લક્ષણો?

New Virus HMPV Outbreak : શું ચીનમાં ફેલાયેલી નવી બીમારી કોરોના કરતાં પણ ખતરનાક છે? શું છે આ નવી બિમારીના લક્ષણો?

09:36 PM January 04, 2025 Gujju News Channel

કોરોના બાદ હવે નવા વાયરસ HMPVનો ખતરો ચિંતાનો વિષય બન્યો છે, ચીનમાં ફેલાઈ નવા વાયરસના લીધે ઈમરજન્સી લાગુ કરાઈ હોવાના સુત્રોના સમાચાર છે. ત્યારે આવો જાણીએ તેના લક્ષણો અને જોખમ.

Human metapneumovirus outbreak in China: કોરોના જેવા અન્ય એક ગંભીર વાયરસે ચીન ફરી એકવાર આતંક મચાવ્યો છે. આ વાયરસનું નામ છે હ્યુમન મેટાપ્યુમોવાયરસ (HMPV), જે ખૂબ જ ઝડપથી ફેલાઈ રહ્યો છે અને ફ્લૂ અને કોવિડ-19 જેવા લક્ષણો પેદા કરી રહ્યો છે. કોવિડ-19 રોગચાળાના પાંચ વર્ષ બાદ ચીનમાં આ નવા વાયરસે ચિંતા વધારી દીધી છે.

►ચીનમાં શું છે પરિસ્થિતિ?

રિપોર્ટ્સ અને સોશિયલ મીડિયા પોસ્ટ્સ અનુસાર, HMPV વાયરસ ચીનમાં ઝડપથી ફેલાઈ રહ્યો છે. કેટલાક લોકો એવો દાવો પણ કરી રહ્યા છે કે હોસ્પિટલો અને સ્મશાનગૃહોમાં ભીડ જોવા મળી રહી છે. સોશિયલ મીડિયા પર શેર કરવામાં આવેલા વીડિયોમાં હોસ્પિટલોમાં દર્દીઓની સંખ્યામાં વધારો જોવા મળી રહ્યો છે. કેટલાક લોકોનું કહેવું છે કે ચીનમાં ઈન્ફલ્યુએન્ઝા A, HMPV, માયકોપ્લાઝમા ન્યુમોનિયા અને કોવિડ-19 જેવા ઘણા વાયરસ એકસાથે ફેલાઈ રહ્યા છે. જો કે, ચીને કટોકટીની સ્થિતિ જાહેર કરી છે કે નહીં તેની કોઈ પુષ્ટિ થઈ નથી.

► HMPV હ્યુમન મેટાપ્યુમોવાયરસ શું છે?

હ્યુમન મેટાપ્યુમોવાયરસ એ એક આરએનએ વાયરસ છે, જે ન્યુમોવિરિડે પરિવારનો છે. આ વાયરસ સૌપ્રથમ 2001માં ડચ સંશોધકો દ્વારા શોધાયો હતો. અભ્યાસો દર્શાવે છે કે આ વાયરસ ઓછામાં ઓછા 60 વર્ષથી અસ્તિત્વમાં છે. તે એક સામાન્ય શ્વસન સમસ્યા છે, જે સમગ્ર વિશ્વમાં ફેલાયેલી છે અને મુખ્યત્વે ખાંસી અને છીંકથી નીકળતા ટીપાં દ્વારા ફેલાય છે. ચીનની સીડીસીની વેબસાઈટ અનુસાર, આ વાયરસના ચેપનો સમયગાળો 3 થી 5 દિવસનો છે. HMPVની સામે શરીરની રોગપ્રતિકારક શક્તિ ખૂબ નબળી હોવાથી વારંવાર ચેપ લાગી શકે છે.

►HMPV હ્યુમન મેટાપ્યુમો વાયરસના શું છે લક્ષણો?

HMPV ફ્લૂ જેવા લક્ષણો માટે જાણીતું છે અને તે કોવિડ-19 જેવા લક્ષણો પણ પેદા કરી શકે છે, જેમાં મુખ્યત્વે નીચેનાનો સમાવેશ થાય છે:

કોરોના જેવા લક્ષણો
શરદી અને ઉધરસ
તાવ અને ઉધરસ
શ્વાસ લેવામાં તકલીફ (કેટલાક ગંભીર કેસોમાં)

►સૌથી વધુ જોખમ કોને છે?

બાળકો અને વૃદ્ધોને HMPV વાયરસથી સૌથી વધુ જોખમ છે. કોરોનામાં પણ આ બંને વર્ગના લોકોને વધુ મુશ્કેલીઓનો સામનો કરવો પડ્યો હતો. આ વાયરસના વધતા પ્રકોપને જોતા ચીનને એલર્ટ રહેવા માટે કહેવામાં આવ્યું છે અને લોકોને સ્વચ્છતા જાળવવા અને માસ્ક પહેરવાની સલાહ આપવામાં આવી રહી છે. ચીનમાં ફેલાઈ રહેલો HMPV વાયરસ એક ચિંતાનો વિષય છે, ખાસ કરીને બાળકો અને વૃદ્ધો માટે. જો કે, એ યાદ રાખવું જરૂરી છે કે આ એક સામાન્ય શ્વસન વાયરસ છે અને મોટાભાગના લોકો માટે તે ગંભીર નથી. તેમ છતાં, સાવચેતી રાખવી અને લક્ષણો દેખાય તો ડોક્ટરની સલાહ લેવી જરૂરી છે.

ડિસ્ક્લેમર: આ સમાચારમાં આપવામાં આવેલી કેટલીક માહિતી મીડિયા રિપોર્ટ્સ પર આધારિત છે. કોઈપણ સૂચનને અમલમાં મૂકતા પહેલાં, તમારે સંબંધિત નિષ્ણાતની સલાહ લેવી જોઈએ.